WAZIRI MAVUNDE ATATUA MGOGORO WA WACHIMBAJI MADINI MALERA-TARIME

 


Na mwandishi wetu

_Aondoa zuio la awali la mgao wa mawe_


_Aelekeza Wachimbaji waruhusiwe na mgawo kuanzia kesho tarehe 26.03.2024_


_Wachimbaji waishukuru Serikali kwa utatuzi wa mgogoro na wenye Leseni za kuchimba dhahabu_


_Asisitza wachimbaji wadogo wasiondolewe katika maeneo ya uzalishaji_


Waziri wa Madini *Mhe. Anthony Mavunde* leo Machi 25, 2024  amefika katika eneo la Malera Wilaya ya Tarime, Mkoa wa Mara kwa ajili ya utatuzi wa mgogoro baina ya wachimbaji wadogo wamiliki wa Leseni na Kampuni ya *KIRIBO* ambao ulipelekea zuio la mgawo wa mawe mpaka baada ya utatuzi wa mgogoro huo.


Waziri Mavunde ametumia takribani saa 6 kutatua mgogoro husika katika Ofisi ya Mkuu wa Mkoa wa Mara kwa kushirikiana na Mkuu wa Mkoa wa Mara, watendaji wa wizara na viongozi wa wachimbaji wadogo mkoa wa Mara (*MAREMA*)


“Ni maelekezo ya Mhe. Rais Dkt. Samia Suluhu Hassan juu ya utatuzi wa migogoro mbalimbali katika sekta hii ya madini ambayo inadhoofisha kukua kwa uzalishaji wa madini," amesema Mavunde 


Aidha, amezipongeza  pande zote kwa kuridhia makubaliano katika hatua ya awali ya kutatua mgogoro huo.


Ameongeza kwamba kwa kuwa kulikuwa na zuio kwamba mgao wa mawe yaliyozalishwa usimame kwasababu ya mgogoro huu, ameelekeza  zuio hilo liondolewe na mgao wa mawe uanze kesho mapema tarehe 26.03.2024.


"Pia, hakikisheni katika utekelezaji wa wa maridhiano haya,  wachimbaji wadogo hawaondolewi katika eneo hilo na waachwe waendelee na shughuli zao," amesema Mavunde.


Akitoa maelezo ya awali, Mkuu wa Mkoa wa Mara *Mhe. Said Mtanda* amemshukuru Waziri Mavunde kwa kufanikisha utatuzi wa mgogoro husika na kupongeza hatua za kuruhusu mgao wa mawe kwa kuwa hali ya kipato ya wananchi wa eneo hilo ilikwenda chini na mapato ya serikali kutopatikana kwa wakati.


Zaidi ya watu *2000* wananufaika na mgodi huo ambao umekuwa ni shughuli kubwa ya kiuchumi ya wananchi wa Malera.







Post a Comment

0 Comments