UTEKELEZAJI SERA YA JINSIA NA MAENDELEO YA WANAWAKE, WAJASIRIAMALI 675 WAWEZESHWA MASHINE

 





Na WMJJWM, Dar Es Salaam


Waziri wa Maendeleo ya Jamii, Jinsia, Wanawake na Makundi Maalum Mhe. Dkt. Dorothy Gwajima amepokea msaada wa Vyerehani 425 na mashine za kutotolesha vifaranga 250 kwa ajili ya wanawake wajasiriamali nchini.


Msaada huo uliotolewa na Serikali ya China, wenye thamani ya Tsh. Mil. 79 umekabidhiwa na Balozi wa China nchini Tanzania Mhe. Chen Mingian katika hafla fupi iliyofanyika mkoani Dar es Salaam Aprili 29, 2024.


Akipokea msaada huo, Waziri Dkt. Gwajima amesema Tanzania inatambua umuhimu wa Wanawake kushiriki katika shughuli za kiuchumi hivyo msaada huo utakuwa chachu kwenye program ya uwezeshaji wanawake kiuchumi inayoongozwa na na Kinara wa Dunia na Taifa Mhe Dkt Samia Suluhu Hassan, Rais wa Jamhuri ya Muungano wa Tanzania kwa ambapo, itawaongezea ari wanawake kwenye kuongeza uzalishaji na ushonaji wa nguo na uzalishaji wa vifaranga hivyo kuongeza pato na kuchangia uchumi wa Taifa.


“Tukio hili ni muendelezo wa mahusiano mema ya muda mrefu  kati ya Tanzania na China. Msaada huu ni chachu kwa wanawake wa Tanzania kuwekeza katika viwanda vidogo na vya kati vya ushonaji na udarizi nguo" amesema Waziri Dkt. Gwajima.


Aidha amebainisha kwamba Serikali inatekeleza Sera ya Taifa ya Jinsia na Maendeleo ya Wanawake ya mwaka 2023 inayotoa kipaumbele kuwezesha wanawake kiuchumi pamoja na kuondoa ukatili wa kijinsia.


Kwa upande wake Balozi wa China nchini, Mhe. Chen Mingian amebainisha kuwa, kwa kipindi alichofanya kazi Tanzania amejionea Rais Samia Suluhu Hassan akitilia mkazo masuala yanayohusu wanawake na kushuhudia baadhi ya wanawake wenye uwezo mkubwa.


Ameongeza kwamba Ubalozi wa China hivi umekuwa ukitoa misaada mbalimbali ya kuwanufaisha wanawake kwenye maeneo tofauti nchini kwa lengo la kuimarisha ustawi wa wananchi, hivyo msaada huo anaamini utawasaidia walengwa kuongeza kipato.


Akipokea vifaa hivyo kwa niaba ya wanawake, Mwenyekiti wa Jumuiya ya Wanawake Tanzania kupitia Chama cha Mapinduzi Mary Chatanda, ameushukuru Ubalozi wa China kwa kuikumbuka CWT kama sehemu ya wanufaika hivyo hawana budi  kuendeleza mradi huo kama jukumu la msingi kwa ustawi mkubwa ili kuwa na uchumi imara.





Post a Comment

0 Comments